Rogozno/Willmersdorf. Młoźinski aktiw Domowiny jo se tudy zmakał wałtoru zachadny tyźeń wjacor. Dla togo, až su se wobźělili „jano“ ze šesćich jsow, jo śěgnuł młoźinski koordinator Helmut Matik tu konkluziju, až njedeje měś take zmakanja we casu europskego mejstarstwa we balokopanju.

Weto su mógali se tam derje wuměniś. Jaden tych nejwažnjejšych dypkow jo było wugódnośenje wuběźowanja wó njerědnjejšy majski a swětkowny bom. Jano, až lětosa njejo žeden swětkowny pśipódla był. W Hochozy a w Drjenowje, źož stajaju cesto swětkowny bom, jo lětosa majski bom stojał.

Wobźělili su se na tom wuběźowanju lětosa 14 młoźinske a wejsne kupki. Samo z Rownego pla Běłeje Wódy su fotografije a druge „dopokaze“ do Domowinskego běrowa pósłali. A z Baršća njejo se jano Rogow, ako južo kužde lěto, ale teke Rjasnik/Briesnig wobźělił. Pśidatnje su tśi źiśece kupki stajali majske bomy a se wobźělili na wuběźowanju. Jich wugbanje jo se gódnośiło ekstra.