Z Słopišć/Schlepzig. Pó dłujkej pśestawce korony dla jo se 19. maja 2022 zasej studijny źeń Šule za dolnoserbsku rěc a kulturu wótměł. Dogromady 29 maminorěcnych a serbski powědajucych jo se wobźěliło. Pśi nejlěpšem wjedrje su se wobźělniki nejpjerwjej w burskem muzeju pód stareju muzeumoweju lipu zmakali.

Pó zapokazanju pśez wjednicu burskego muzeuma Słopišć, Sabine Kampradowa, jo Uta Henšelowa pokazała na serbsku zachadnosć teje stareje jsy. Tak słušaju Słopišća z dokumentariskim prědnym naspomnjenim w lěśe 1004 k jadnej z nejstaršych jsow Dolneje Łužyce. Pśi wobchójźenju pśez muzeum su wobźělniki pó dwórje bogatego bura śěgnuli a su se woglědali wuměńk, krowjeńc a brožnju ze wšakimi rolnikaŕskimi rědami, kótarež su wužywali za žni abo za pśeźěłanje lana. Pó wobjedowej pśestawce jo šło za wšyknych do słopišćańskeje cerkwje, źož jo cerkwinski pomocnik Götze něco wó historiji a twarjenju pachaneje cerkwje wulicował. Ze štucku na orgelach a zgromadnym spiwanim jo pśednosk w cerkwi zakóńcył.