Ze Smogorjowa/Schmogrow. Na wjelebocne stawizny jo směła wognjowa wobora w Smogorjowje zachadny kóńc tyźenja slědk glědaś. Gromaźe ze Smogorjojskimi towaristwami, młogimi wobydlarjami a gósćimi. ale teke z partnarskeju woboru z Obercunnersdorfa a spśijaśelonymi woborami ze susedneje Běłeje Góry a Picnja su 100. narodniny teje wobory dostojnje swěśili.

Južo sobotu su se zmakali wobory Bórkojskego amta na sportnišću gósćowarja na wuběźowanje amta. Nagromadu w šesć kategorijach su tam k tomu nastupili. Zachopili su z tym źiśi a młodostne w styrich starstwowych kupkach. How su južo pokazali nejmłodše smogorjojske, což južo tak wšykno wuměju a su dobyli ned w tśich wuběźowanjach. Jano w starstwowej kupce młoźinskeje wognjoweje wobory pód 14 lět jo była strjažojska konkurenca lěpša, a toś su pśi tom pśišli jano na druge městno.