Teke lětosa buźo indiska kupka pódla: Rangsagar performing arts. Zarědowarje lice – gaž wjedro sobu grajo – z 15.000 woglědarjami na tśich městnach. 
„My comy byś wutšobny a dobry gósćinaŕ“, jo wopisował krajny raźc wokrejsa Sprjewja-Nysa (SPN) Harald Altekrüger wažny zaměr lětosneje folklorneje lawiny. To se stanjo pśecej na taki part, ale wósebnje lětosa jo było jomu wažne, aby na to pokazał. „We tom casu comy dorozměśe mjazy ludami do statka stajiś a dožywiś“, jo wobtwarźił.
Lawina folkloristow se walijo pśez Zły Komorow, Kopańce a Lubnjow.
Dogromady wócakuju 320 wobźělnikow ze 14 ansamblow a 11 krajow.
SPN organizěrujo lětosa 16. folklornu lawinu, 5. raz zgromadnje z wokrejsom Górna Łužyca-Błota (OSL). Žarjabnice Sprjewja-Nysa a Dolna Łužyca stej głownej sponsora za ten festiwal.
