Z Běłeje Wódy/Weißwasser. Mě Pluta jo kradu zwězane z jatšownymi jajami. Pěś generacijow a sedym familijowych cłonkow se z teju tradiciju zaběra. Kurt Pluta jo był naroźony 14. septembera 1935 w Górnej Šlazyńskej a jo južo ako góle wuknuł to škrabanje jajow. Ta technika pyšnjenja dominěrujo až do źinsajšnego dnja w starej domowni. Jogo starka jo jomu to wucyła w domacnej Czissowje (pó 1938 Dünenfeld, źinsa Cisowa).

Kurt Pluta jo w lěśe 1961 pśišeł z Pólskeje do Běłeje Wódy. Něnto bydlecy srjejź serbskeje Łužyce, jo wón ako inženjer za chemiju źěło namakał w głažaŕni (Glaswerk) a jo ze swójim hobbyjom, pyšnjenim jatšownych jajow, był na pšawem městnje. W serbskich jsach wokoło Běłeje Wódy jo zmakał wjele luźi, kótarež jo se teke rad z jatšownymi jajami zaběrało. W lěśe 1970 jo zapódał škrabane jatšowne jajo pla „Wuběźowanja nejrědnjejšego serbskego jatšowne jaja“. Luźe su se źiwali, wšak płaśi to škrabanje jajow ako wusoke wuměłstwo, kótarež se nejwěcej procow pomina. Lětosa, 2022, jo se 54. raz wobźělił na tom wuběźowanju, slědny raz.