Z Baršća/Forst. Łoni běchu we wokrejsnem sejmje Sprjewja-Nysa wobzamknuli, až kśě płaśiś tym, ako studěruju na serbsku ceptaŕku a serbskego ceptarja, pśidatny stipendium, a to wót 500 euro wob mjasec. Za to pak deje wóni nanejmjenjej lěto wucyś dolnoserbsku rěc w šuli w wokrejsa SPN.

Až do kóńca lěta 2021 běchu se za tśi študańcki Instituta za sorabistiku w Lipsku za to pśipowěźeli we wokrejsnem zastojnstwje w Baršću. Slědny tyźeń pónjeźele su se wóni pśedstajili pśed wósebnym fachowym gremiumom, a togo cłonki su se musali rozsuźiś za jadnu kandidatku. Ako smy słyšali, njejo to było lažko, pśeto wše tśi su pokazali, až su mócnje angažěrowane za serbsku rěc a serbske šulstwo. Rozsuźili su se za Paulu Hirtojc, ako studěrujo tuchylu we tśeśem semestrje w Lipsku. Wóna jo chopiła serbsku rěc wuknuś na zakładnej šuli w Libanojcach/Laubsdorf a jo za tym chójźiła na Dolnoserbski gymnazium.