Z Chóśebuza/Cottbus. Dnja 5.měrca jo do Města woglědało Spěchowańske towaristwo za Serbski muzej Budyšyn z pśedsedaŕku Annett Brězanoweju. 15 cłonkow towaristwa jo se dało na drogu, aby se woglědało nowu stawnu a wósebnu wustajeńcu w Serbskem muzeju w Chóśebuzu a stupiło do wuměny z chóśebuskim Spěchowańskim towaristwom za Serbski muzej. Pó wuwitanju pśez kuratorku Serbskego muzeja Christinu Kliemowu a pśedsedaŕku Spěchowańskego towaristwa za Serbski muzej Chóśebuz Madlenu Norbergowu jo Christina Kliemowa gósći wjadła pśez nowu stawnu wustajeńcu. Pśez wósebnu wustajeńcu Sammelsur(b)ium jo jich wjadł na wuměńk rozžognowany kurator Werner Měškank. Pó wjeźenjoma jo se pśi kafeju a tykańcu pśizamknuła žywa diskusija, teke wó statkowanju pendantoweju towaristwowu a muzeumowem źěle powšyknje. Cłonkam jo se nowa stawna wustajeńca spódobała, wósebnje temowa śpa „Wěra a nabóžnina“. Taki specielny aspekt Serbski muzej w Budyšynje njama, lěcrownož pokažo teke zběrku biblijow. Dalej jo było spóznaś, až Serbski muzej w Budyšynje jo wó wjele wětšy ako naš chóśebuski.