Chóśebuz/Cottbus. Dla tog, až serb­ski sedleński rum buźo se powětšyś, ga co dolnołužyska Domowina se pilnowaś wó pśistajenje dalšnego personala. To su gronili na wobradowanju župnego pśedsedarstwa srjodu tyźeń w Turjeju. Župan Harald Końcak jo tu pótrěbnosć Casnikoju rozkładł tak: Gaž jadna gmejna pśistupijo do sedleńskego ruma, ga płaśi tam serbska kazń. Wobydlarje maju pšawo na serbsku wucbu a na pjenjeznu pódpěru za serbske žywjenje. „Z togo nastanu nadawki“, měni Końcak. Serbske zastupniki muse za jogo zdaśim natwariś a źaržaś kontakty k towaristwam a luźimi na měsće, jim raźiś a pomogaś pśi organizěrowanju serbskego žywjenja. A lice teke z tym, až se tam załožyju Domowinske kupki, kótarež budu kśěś serbske kulturne tšojenja we swójich jsach wugótowaś (koncerty abo wustupy Serbskego ludowego ansambla) abo decentralne kubłanja dostaś. Za zdaśim župana by dejali dweju noweju sobuźěłaśerjowu móc pśistajiś. Až take buźo se raźiś, jo pó jogo měnjenju realistiske, rownož njebuźo se nejskerjej staś ned.