To se wě, až na zachopjeńku nowego lěta jo góźba, aby my slědk glědali na tšojenja zachadnego lěta. Tak glěda prědny Rozhlad nowego lěta slědk na te pśinoski, ako su wopśimjeli Rozhladowe wudaśa zachadnego lěta. Wóny pśeglěd Rozhladowych pśinoskow, fotow, wobrazow a pśisłušnych awtorow z lěta 2021 namakajośo wesrjejź januarskego wudaśa.

Na jogo zachopjeńku cytaśo komentar šefredaktorki Katrin Čornakec z titelom „Što je nam kultura hódna?“. Wóna tam reflektěrujo, kak jo se korona-pandemija w slědnyma lětoma wustatkowała na našo kulturne žywjenje. Gaž kulturny wjerašk buźo drošy dla pósajonego testowanja, se wóna pšaša: „Je kultura nam tole hódna?“ Dajo ga něnto teke w Serbach online-póbitowanja w pśiběrajucej licbje, te su tunje abo dermotne. Toś wuchada Katrin Čornakec z togo, až kulturna krajina se nejskerjej dalej změnijo. Chyla pak teke zajm na to, až w Serbach jo se južo pśed pandemiju stajiło to pšašanje, wjele jo nam kultura gódna. Chyla zajm na to, což kulturniki wugbaju a kaki respekt se pópšawem zasłužuju.