Někak 5% wobydlarjow města pśiźo z cuzego drugego kraja. To jo jich wót tych něnto pśisamem 100.000 luźi, ako bydle w Chóśebuzu a w wokolnych jsach, ako buchu městoju pśed lětami pśibite, wušej 5400 žeńskich, muskich, młodostnych a źiśi z 130 wšakich krajow cełego swěta. Naprědku su to luźe ze Syriskeje, Pólskeje, Rusojskeje, Ukrainy a z Afganistana. K tomu pśiźo hyšći wokoło 2000 młodych luźi ze 80 wšakich krajow, ako studěruju na Bramborskej techniskej uniwersiśe.

To a wjele wěcej jo slědny tyźeń na pósejźenju měsćańskego parlamenta k wěsći dał Serb a Domowinaŕ Jan Šurman, kenž ga jo w měsćańskem zastojnstwje zagronity za wšykno to, což ma cyniś z integraciju. Ako dobry pśikład za to, kak wšo funkcioněrujo a kak se luźe z drugich krajow zepśěgnu do cełego žywjenja w měsće, jo wón mjenował wietnamskich wobydlarjow, kótarež su za wětšy źěl južo z casa DDR w Chóśebuzu. Wóni maju teke swójo wósebnje towaristwo, kótarež jo gano wóswěśiło swójo 10lětne wobstaśe.