Z Budyšyna/Bautzen. Južo 17. decembra jo se Marko Kowar w Serbskem domje w Budyšynje z koleginami, kolegami, cłonkami gremijow Domowiny a partnarjami swójeje dłujkolětneje źěłabnosći rozžognujo. Marko Kowar źo pó 35 lětach źěła w serbskich institucijach, w slědnych pěś lětach ako jadnaŕ Domowiny, na wuměńk. Domowina změjo wót 2022 nowu jadnaŕku, to jo Judith Šołćina.

Pśed 35 lětami jo Kowar prědny raz měł źěłowe městno „we winicy serbskego luda“, ako groni, ako wědomnostny sobuźěłaśeŕ w Domje za serbsku ludowu kulturu (DSLK), zagronity za sektor muziku. Wót 2017 jo ako jadnaŕ stojał na cole zastojnstwa kšywowego zwězka.

Wón jo študěrował kulturnu wědomnosć a sorabistiku w Lipsku. Wót 1996 jo źěłał w zastojnstwje Domowiny ze wšakimi zagronitosćami – do 2002 referent za kulturu, pón w nowo twórjonem resorśe referent za góspodaŕstwo a infrastrukturu až do 2016, tśi lěta pśetergnjone, źož jo był wót 2011 do 2013 jadnaŕ w Serbskem ludowem ansamblu (SLA). Pśisamem kuždy wšoserbski swěźeń pó 1989 jo na zagronitem městnje sobu organi-zěrował. Wón jo 40 lět ženjony, ma pěś źiśi a šesć źiśiźiśi.