W lěśe 2017 jo wón se na mjazynarodnej źěłaŕni rězbarjow w Miłoćicach wobźělił. Do wjelikego granitowego kamjenja jo rězbnił wrona. Pód kśidłom jo z błoścom wubił tekst „Krabat und Magie“. Tu twóŕbu jo wuměłc Jörg Tausch pomjenił „Krabatowy kamjeń“ a ten móžomy pśi Miłočańskej skale mjaz dalšnymi figurami, wót wóterych wuměłcow z tu- a wukraja, wobźiwaś. Tek na dalšnej źěłaŕni jo se źinsa 54lětny rězbaŕ, tśasaŕ kamjenjow, mólaŕ, stukater, wuměłstwowy terapeut a pedagoga z Rownego wobźělił a z granita stwórił graba, serbskeje bajkoweje figury. „Dajom kamjeń rěšyś a dodajom pótom detaile za wutwórjenje pśedwiźonych figurow a motiwow“, groni wuměłc. Wjele jogo wuměłskich twóŕbow jo mjaztym na wšakich městnach we Łužycy a zwenka njeje wiźeś: stele, skulptury, mólby, grafiki, stukowe detaile na wenkownych sćěnach twarjenjow a w domach kaž tež ilustracije w knigłach a kalendrach. Pśi tom zwuraznijo Tausch tek ze serbskimi powěsćowymi figurami a z póśěgom na stawizny a pśibytnosći swóju dłymoku zwězanosć ze serbskeju kulturu a žywjenim Serbow.