Budyšyn/Bautzen.Wóno se njoco wěriś, kak aktuelny a moderny ten źiwadłowy kus hyšći źinsa jo, pśisamem 40 lět pó premjerje. Graśe Mein vermessenes Land z pjera Jurija Kocha jo se pokazało na jawišću prědny raz w Halle w lěśe 1977 (pód titelom Die Landvermesser). Pózdźej jo censura film Rublak – die Legende vom vermessenen Land (na pódłožku togo samego tšojenja) wobrězała a te nejwěcej politiske fragmenty z filma wen chyśiła. To pšašanje, ak se staja na jawišću, zni: Jo-li derje, až techniski póstup (Fortschritt) wše tradicije skóńcujo? Co wóstanjo wót kultury a rěcy serbskich luźi, kótarež stoje bageram na zadorje? Take cwiblowanja na statnej politice njejsu byli za cas DDR rad wiźone.