Z Města/Cottbus. Lětosa jo se to mjaztym tśeśi raz raźiło, až su pšosyli wejsne městne źěle Chóśebuza, aby se wobźělili na wokrejsnem wuběźowanju w ramiku krajnego wuběźowanja „Naša wjas ma pśichod“. 2015 jo Chóśebuz to wokrejsne wuběźowanje prědny raz pśewjadł. Pśiduca „runda“ jo była 2017, a ta, ako by pópšawem 2020 była, jo se pandemije dla na 2021 pśesunuła. Móžne kandidaty su mógali až do kóńca apryla swójo wobźělenje pśizjawiś. Slědkoju su se we toś tom aktualnem wuběźowanju wobźělili styri chóśebuske měsćańske źěle z wejsnym charakterom: Rogozno, Rogeńc, Škódow a Depsk.