Z Budyšyna/Bautzen.Wałtoru tyźeń jo Rada Załožby za serbski lud gromadu stupiła za nazymske pósejźenje. Srjodu za tym jo pšosyła na digitalne medijowe rozgrono, aby k wěsći dała wšake nowosći. Pó zawjeźeńskich słowach Hany Budarjoweje, zagroniteje załožby za marketing a kooperacije, jo powědała Susann Šenkec. Ako pśedsedaŕka załožboweje rady jo wóna wobwěsćiła, až su pó-stajili nowy góspodaŕski plan (Haushaltsplan) za pśiduce lěto. Za tym, až su w juliju pódpisali stwórte dogrono za financěrowanje (Finanzierungsabkommen) ze Zwězkom, z Bramborskeju a Sakskeju, ma Załožba za serbski lud 2022 jadnab 29 milionow euro k dispoziciji. Wušej togo jo rada wobzamknuła dwě směrnicy za spěchowanje (Förderrichtlinien). Z tym jo Załožba za serbski lud pśigótowała wužywanje pjenjez za projekty we wuglowych stronach Łužyce. Te deje se pśewjasć wót lěta 2022 w ramiku spěchowańskego programa „Serbska rěc a kultura w strukturnej změnje“.