Z Města/Cottbus. Su planowali, až lětosa se wótmějo tradicionelny gódowny projekt Rěcnego centruma WITAJ (RCW), Serbskego muzeja Chóśebuz a jogo spěchowańskego towaristwa w rumnosćach Serbskego muzeja. To by było wałtoru, srjodu a stwórtk. Dla problematiskeje korona-situacije jo RCW pak wótpowěźeł ten projekt w zwuconej formje. Młoge šule su jich pšašali za alternatiwam, teke RCW sam jo how a tam póbitował, až nanejmjenjej małki woglěd do daneje šule wuknikam zajmne dožywjenje a wjasele napórajo. Z dwěma šuloma su slědkoju něco wucynili. Wałtoru su pśišli Aleksander Draguła wót RCW, Christina Kliemowa wót Serbskego muzeja, Janšojski bog a jeje pśewóźaŕka do zakładneje šule w Libanojcach. Srjodu su pśišli do brjazyńskeje šule. Christiana Kliemowa jo źiśam wšake wulicowała wó serbskem nałogu z Janšojskim bogom. Pótom jo Janšojski bog źiśi z wupyšnjoneju witku žognował a jim mału słodkosć wobraźił.