Z Města/Cottbus. Chto by se myslił, až jadno zwězkowe pósejźenje Zwězka lichych nimskich awtorow („Freier deutscher Autorenverband“ – FDA) mógało bitowaś wósebnu platformu za serbsku tematiku? Take něco jo lětosa dało, ga wót slědnego pětka do njeźele, ako jo Bramboski krajny zwězk togo Zwězka lichych nimskich awtorow organizěrował zwězkowe pósejźenje w Chóśebuzu. Jich pósejźenje respektiwnje sympozium jo zmóžnił literariske drogowanje pó rěcu a casu, ga glědajucy na mjeńšynowe rěcy w Nimskej na pśikłaźe serbskego rěcnego ruma w Dolnej a Górnej Łužycy. To su pśewjadli pód titelom: „DOMOWNJA. CUZBA. RĚC“, a dalej: „Vom Limes Sorabicus zur Schwarzen Mühle, zu Krabat, den Lutkis bis zu Fürst Pückler – Slawische Sprachinseln in Deutschland“. To zarědowanje jo stojało pód patronatstwom wušego šołty Chóśebuza Holgera Kelchera, kenž sam pak njejo mógał pódla byś. Na jogo městnje jo decernent Thomas Bergner póstrowjeńske słowa zboka Města na tych něźi 60 wobźělnikow směrił – młoge su pśišli ze wšakich rožkow Nimskeje, tek z Awstriskeje a Belgiskeje mjazy drugim.