Ze Škódowa/Skadow. Zachadny pětk wjacor jo redakcija Serbskeje Pratyje 2022, gromaźe z Ludowym nakładnistwom Domowina a Domowniskim towaristwom Depsk/Majberk-Škódow, pšosyła na premjeru swójich knigłow. W škódojskej Širgottojc kjarcmje, kótaraž jo teke wiźeś na wobalce lětosneje Pratyje, jo jadnab 50 luźi gromadu pśišło. Gósći su połnili wjeliki zal kjarcmy a pśisłuchali cytanjeju w serbskej a nimskej rěcy.

„To jo było pśechwatanje a wjelgin rědny wjacor“, groni Heiko Lobert k tomu. Wón jo pśigótował premjeru, pśewóźił cytanje z prezentaciju fotow na płachśe a jo na starosći měł knigłowe blido serbskego nakładnistwa. „Cesto njejo teliko woglědarjow, źinsa pak jo se to wjelgin raźiło za wšych.“ Wušej togo jo pěś žeńskich chójźiło serbski a wšake serbske awtory, ako na pśikład Horst Adam a Erwin Hanuš, su teke byli pódla.