Z Města/Cottbus. Mjazy tymi knigłami z Ludowego nakładnistwa Domowina, ako luźe tuchylu raźi kupuju a cytaju, su jadne knigły w nimskej rěcy. Jich titel jo „Was wir in uns tragen“, a napisał jo je Křesćan Krawc/Christian Schneider, serbski spisowaśel z Budyšyna.

To wósebnje na tych knigłach jo to, až njejo se wón te tšojenja samwumyslił, ako jo to za wětšy źěl w romanach. Ně, wón jo to napisał, což su jomu serbske luźe z Dolneje a Górneje Łužyce wulicowali ze swójogo žywjenja. A pśi tom stoj to ceło naprědku, co su dožywili dotychměst z tym serbskim, kak su z tym kšuśe zwězane. Mjazy drugimi su to Fryco Wojto z Hochoze, Mato Krygaŕ, kenž póchada z Picnja, a Šramic familija z Gołbina. Awtor jo cesto ducy, aby swóje knigły (wóni su se śišćali teke w serbskej rěcy) luźam pśedstajił. Ducy jo był mjazy drugim w Lubinje a w Bórkowach, a slědny tyźeń wałtoru su jogo wuwitali w Serbskem domje w Chóśebuzu. Pśepšosyła jo jogo Dolnoserbska biblioteka, ako organizěrujo cesto „serbske cytanja“.