Z Budyšyna/Bautzen. Zachadny pětk jo Domowina pśepšosyła 13 angažěrowanych Serbow do tudejšego Serbskego domu, aby jich pócesćiła. Myto Domowiny za „cesnoamtske statkowanje ze wšoserbskim wuznamom“ su dostali něgajšna ceptaŕka Brigitta Räßlerowa, spisowaśel Beno Budaŕ (chórosći dla njejo pódla był) a zasłužbna žurnalistka Marija Elikowska-Winklerowa. Wóna jo lětźasetki dłujko nawjedowała Šulu za dolnoserbsku rěc a kulturu w Chóśebuzu. Wušej togo jo znata ako „serbska pójsynoga“. Hyšći źinsa źěła ako reportaŕka a powědaŕka za serbski program rbb.