Sobotu, 21.05.2016, zeger 13.30, w telewiziji rbb

Moderator Christian Matthée Was wuwitajo tenraz wót „błośańskeje nocy powěsćow“ w Bórkowach. Wón powěda z aktěrami Serbskego ludowego ansambla a wulicujo tšojenje lěta 2016. „Lasć“ – tak jo titel lětosnego dyrdakojstwa lutkowu Jolka a Jorko.

Dalšne temy:

– Cas za pšosby gmejnow wó pśisłušnosć k serbskemu sedleńskemu rumoju wótběgnjo 31. maja. Rozpšawijomy wó debaśe baršćańskich měsćańskich wótpósłańcow, zespominajomy južo znate rozsuźenja a powědamy z Utu Henšeloweju wót Serbskeje rady wó dalšnych stopnjach zastupnistwa dolnoserbskich zajmow w bramborskem krajnem sejmje.

– Žylojska „Pśěza“ jo njedawno mógała wuswěśiś swójo 25-lětne wobstaśe. To znate drastwowe towaristwo co se něnto wěcej koncentrěrowaś na rejowanje. Jogo prědnu rejowańsku źěłarnju pśewóźujomy z kameru .

– W našej seriji z portrejami młodych Serbow Wam pśedstajijomy wuspěšnego dolnoserbskego „rěcnego olympionika“ Karola Melchera.

– Serbska „telewizijna pójsynoga“ Anja Kochojc slěźi k drugemu razoju za serbskimi slědami w Strjažowje.