Z Janšojc/Jänschwalde. Serbski wólbny forum, to njejo kradu nowa wěc. Až ten forum se wu nas sobu organizěrujo wót Nowego Casnika, to pak jo nowum. Šesćo kandidaty su pśišli na pśepšosenje Domowiny a Nowego Casnika pónjeźele wjacor do športaŕskego domu w Janšojcach pód gołym njebjom. Tam su te kandidaty wabili, aby luźe swóju kśicu rowno pla nich cynili, a su toś rozpšawili, co by měli prědk ako wótpósłańce we Zwězkowem sejmje. Jo, a teke njejsu jano chwalili jaden drugego, což jo było wótcakowaś. Mjazy tymi politikarjami su byli take, kenž maju ako něntejšne abo něgajšne wótpósłańce w Bramborskem krajnem sejmje wěste nazgónjenja, a teke nowacki w parlamentariskem źěle ako Maja Wallsteinowa (SPD) abo Laura Širicowa (Schieritz, FDP).
Pśišli su zajmce z Janšojc, mjazy nimi radna licba młodych luźi. Dalšne zwěrne Serbowki a Serby ze susednych jsow su teke pódla byli. Někak 60 luźi jo to było, kenž jo sejźeło, słuchało a pšašało. Jaden a drugi jo casy barcał, dokulaž njejo spokojom ze źěłom politikarjow powšyknje. Hyšći we wětšej licbje su pšyce se pórali.