Z Města/Cottbus. Sobotu, 8. junija, jo źaržał kulturny antropolog z Barlinja Nils Seethaler pśed 26 luźimi w „Gründungszentrum Startblock“ w Chóśebuzu zajmny pśednosk z titelom „Der Hahn in den Bräuchen der Sorben und Wenden – Geschichte und Kulturvergleich“. Pśednosk jo se wótměł w ramiku nalětnego zejźenja Dolnołužyskego towaristwa za stawizny a krajowědu z.t. (Niederlausitzer Gesellschaft für Geschichte und Landeskunde e.V.), na kótaryž jo jeje wót 2023 amtěrujucy pśedsedaŕ Jens Lipsdorf cłonki towaristwa a casnikaŕskich zastupnikow pśepšosył. Pśi tom zejźenju su tek wósebnje celebrěrowali 140-lětny jubilej towaristwa, kenž jo se 3. junija 1884 ako „Niederlausitzer Gesellschaft für Anthropologie und Urgeschichte“ w Kalawje załožyło.