To jo jadno wóžnjete pólo pla Hochoze. Glědajśo, kaki wjasoły ten gólc jo, až jo tak wusoko zalězł! 
Lube źiśi, ja mam rědnu ideju za was. Źiśo z mamu a nanom na pólo. Dla cogo? Něnto su žni. Tak se groni casoju, źož rolnikarje trajdu žněju. Změstymi jo wšo južo wóžnjete. Ale hyšći nic z póla wuwózone! Ta słoma jo stłocona a zwězana do wjelickich kulowatych walikow. A te waliki laže kaž klocki jadnogo wjelikana, rozchytane pó cełem pólu. To luštnje wuglěda!
Wy móžośo wopytaś ten wjeliki kulowaty walik wokus bulnuś. To jo chytše graśe. Nan a mama dejtej wam pomogaś, wón ga wažy jadnab 200 kg! A wón jo bejnje wusoki. Gaž na njen zalězośo, buźośo na cełu wokolinu wótgórjejka glědaś. Nan dej wam pomogaś!
Nan a mama musytej jano glědaś, aby wy žednu škódu njenapórali. Ten walik njedej rozpadnuś. Howacej buźo ten bur wjelgin zły.
To wam raźi waš wujk Gregor
