Z Wórjejc/Hoyerswerda. Na rozdźěl k Bramborskej, źož Serbski sejm njejo žednogo swójogo kandidata za Serbsku radu wustawił (glej powěsć na 1. boce), su wóni w Sakskej, za tamnu Serbsku radu, jadnogo kandidata namakali. Za powěsću Marcela Braumanna, župana Domowinskeje wórjejskeje župy „Handrij Zejler“, jo to 28lětny Alexander Pólk, historikaŕ a sobuźěłaśeŕ Serbskego muzeja w Budyšynje. To wósebne jo: Z rownju ze Serbskim sejmom jo wórjejska župa jogo ako kandidata wustawiła. Župa chwali Pólka mjazy drugim za jogo grono na głownej zgromaźinje Domowiny lětosa w nalěśu, źož wón jo se za jadnosć Serbow wugronił. Wóni cesće jogo rozgranjańsku a jadnańsku kulturu: „Wón rad jědernje argumentěrujo, ale žednje zakósćiwje, a jo dla togo wobogaśenje kuždego demokratiskego gremiuma“, stoj we powěsći Braumanna.

Serbsku radu w Sakskej njewuzwólujo ceły serbski lud kaž w Bramborskej. Tych pěśoch kandidatow sakskeje Serbskeje rady nominěrujo pśedsedaŕstwo Domowiny, a sakski parlament jich pówołujo.