Ako mója starka jo młoda žeńska była, jo někaka znata (teke z Dolneje Łužyce, wótkul dokradnje, pak wěcej njewě) jej dariła toś ten recept, z kótarymž móžośo wupjac cele lažki a zrownju cele lěbgodny, mězgojty jabłukowy tykańc! A dla cog njedej raz regionalny recept na serwisowem boce Nowego Casnika městno měś? Jabłukowy tykańc ga derje pasujo do nazymskego casa – a snaź tek móžo pitśku zwignuś lawnu w naglěźe tuchylneje situacije.

Tak to źo:

Margarina musy nejpjerwjej dosć měka wordowaś. Scyńśo ju na 15 do 20 minutow na talarje do pjaca pśi někak 50 stopnjach. Gaž pitśitśku rozejźo, jo to derje. Pón ma se wóna we šklě z měšańskim rědom rozměšaś. Te dalšne pśicynki śěsta maju se we toś tom rěźe pśidaś, ako jo we šerem kašćiku pódane. Wažne: Kuždy pśicynk ma se sam za se rozměšaś (teke kužde jajo dejśo ekstra měšaś). To jo ten trik, aby to śěsto se wósebnje derje raźiło!