Z Budyšyna/Bautzen. Dla korona-pandemije su se musali někotare pśedstajenja Serbskego ludowego ansambla wótpowěźeś, a dla płaśecych póstajenjow pśecej hyšći njamógu k cele normalnemu graśu se wrośiś. Ale mjaztym maju zasej móžnosć, to jadno a druge zarědowanje pśewjasć. Nejpjerwjej pak nic w dolnołužyskich stronach, ale w Budyšynje. Zachopiju z komorowym koncertom „Klingende Nacht- phantasien“ (stwórtk, 2. julija, zeger 20:00, w budyšyńskej Bergaŕskej zagroźe) a dalej źo njeźelu, 5. julija, gaž moderěrowany koncert z titelom „Der Dudelsack“ změjo zeger 16:00 w Serbskem muzeju w Budyšynje swóju premjeru. Tam buźo dudak a spiwaŕ Andreas Hentzschel sedym wšakorakich dudow pśedstajiś – z informacijami a ze zukami. Chtož góźbu abo lušt njama, se na SLA-zarědowanja w Górnej Łužycy wupóraś, chtož docakaś njamóžo, až se zasej w bliskosći grajo, abo chtož jadnorje narski jo, ten jo pšosony, sebje Serbski ludowy ansambel pśez internet do swójeje dobreje śpy holiś. Lěc Instagram, Facebooku abo Youtube – glědajśo do jich accountow, aby mógali se wobźěliś na jich akcijach a póbitowanjach.