Na internetowem boce https://www.witaj-sprachzentrum.de (glej „Download“, pón „Materialije za šulu“) jo nowe póbitowanje. Redaktor wuknikojskego casopisa Płomje Bernd Melcher staja wucecym a wuknikam źěłowe łopjena ze wšakich wudaśow digitalnje ako PDF- a Word-dataje k dispoziciji. Tak maju wužywarje móžnosć, nadawki změniś a je wuknjeńskemu procesoju wuknikow pśiměriś.

Tuchylu se jadna wó wuběrk jadnasćo źěłowych łopjenow, kótaryž pak móžo se hyšći rozšyriś. Aktualny wuběrk jo wótgłosowany z konferencu fachowych ceptaŕkow. Wóni pśedewšym wjelgin witaju póbitowanje datajow k wobźěłanju.

RCW Chóśebuz/Bernd Melcher