Z Města/Cottbus. Teke w casu koronawirusa ze wšyknymi z nim zwězanymi wobgranicowanjami a wobśěžkanjami to Źěłanišćo za serbske kubłańske wuwijanje Chóśebuz (ABC) pilnje dalej na wucbnych materialach źěła. W jich běrowje smějo pak tuchylu jano jadna wósoba byś, a wětšy źěl aktualnje 11 sobuźěłaśeŕkow źěła wót doma, wuměnjaju se pśez telefon a mejlki. Až doma žedne słužbne laptopy njamaju a priwatnu techniku wužywaś muse, njejo tak optimalne, ale „projektowe źěło de facto źo normalnje dalej“, jo groniła nam Christiane Piniekowa, wjednica wót ABC. Wóna pak se naźeja, až to ze słužbnym techniskim wugótowanim snaź hyšći móžno buźo.

Ako nejnowša produkcija wót ABC jo w aprylu wujšeł notowy zešywk z cejdejku za „Lutk 1“. Ta fibla pó Witaj-koncepśe z lutkom Minom, kótaruž jo wuźěłała ceptaŕka Hanka Ješcyna, pśedlažy južo wót šulskego lěta 2018/19 za primarny schójźeńk. Wót łońskego dajo k tomu cejdejku ze cytanymi tekstami, a něnto stakim skóńcnje teke k tomu słušajucy spiwny material.