Z Města/Cottbus. Dajo źe mjaztym pópušćenja (Lockerungen) w póstajenju k zagaśenju rozšyrjenja korona-wirusa („Eindämmungsverordnung“) w Bramborskej. Ale južo jasno jo, až nanejmjenjej až do 31. awgusta njesměju se wótměś žedne wjelike zarědowanja. Tak mjaztym dajo za wjele swěźenjow a wjelikich zarědowanjow wótpowěźenje respektiwnje tu pśipowěź, až se to pśesunjo.

Tak buźo teke to 50. jubilejny swětkowny turněr rejtowańskego towaristwa Žylow pśesunjone. Pśigótowanja su južo źaseś mjasecow běžali, ale dla aktualnych póstajenjow stoj ten rozsud, až budu jubilejny turněr 2021 nachwataś. A korona-kriza trjefi to rejtowańske towaristwo w Žylowje rowno w toś tom lěśe, w kótaremž tam wótere jubileje maju: Pódla 50. jubileja swětkownego turněra su pópšawem tek kśěli swěśiś 60-lětne wobstaśe rejtowańskego towaristwa, 30-lětne wobstaśe rejtaŕskeje šule w Žylowje a 45 lět terapeutiskego rejtowanja w Žylowje.