Z Chóśebuza/Cottbus. Pětk, 25. maja, su se zmakali w Serbskem domje zastupniki rady starostow a iniciatiwy za Serbski sejm. Zaměr jo był dorozměśe abo samo zjadnanje wobeju bokowu. Wobej pak njejo se raźiło.

W eslědnych tyźenjach ga su se te aktiwne dolnoserbske cłonki rady starostow kradu distancěrowali wót kursa iniciatiwneje kupki. Zwada jo eskalěrowała (glěj do NC slědnych tyźenjow) a dla togo jo było to zmakanje 25. maja.

Pśibytne su byli wót rady starostow Martin Cerna, René Kochan, Hartmut Leipner, Fryco Libo a Ignac Wjesela z Górneje Łužycy. Teke medije a zajmce wót Domowiny a dalšne su byli pśipódla. Wót iniciatiwneje kupki jo było wokoło pěś luźi. Dogromadu jo było wokoło 20 luźi pśipódla. Duktus styrigóźinskego rozgrona jo był skerjej charakterizěrowany wót mjazsobnego njerozměśa. Teke wumjatowanja njejsu byli rědke.