Z Błotow/Spreewald. Šula za dolnoserbsku rěc a kulturu Chóśebuz organizěrujo pšawidłownje źěłaŕnicki k temam, kótarež maju cyniś z regionom a tradiciju. Mjaz nimi su teke take, kótarež hobbyjowym fotografam zmóžnjaju, raz do dwórow a slězy źurja glědaś. K tomu słuša teke pśedstajenje scenow, ako pokazuju žywjenje pśed sto lětami. Taku scenu su ned kólasujucym fotografam w Bórkojskich Prědnych Prizach (Erste Kolonie) prezentěrowali: Willi Liersch a Lea Müller stej pokazałej nazymski žnjowny cołn, kótaryž jo se chylił k domacnemu dwóroju. Pótom su cołn ze zjadnośonymi mócami, teke tych fotografow, na brjog spórali. Na motiwach how rowno tak njejo póbrachowało, ako na slědujucych městnach – młogi aku jo se musało mjaztym wuměniś.

W Lipjem jo Marlene Jedrowa kupku fotografow z błośańskeju zupu góspodowała, pótom jo Thomas Hegemer jich pśepšosył do cołna a jo jim pokazał Lipje z jogo nejrědnjejšego (fotogenego) boka. Nic kuždy jo wěźeł, až jo wót Lipjego dotychměst jano nadrozne slězne dwóry wiźeł.