Južo pśi lažkem wětšykom libocu jeje listy, což napórajo teke znate gronko „wón/a se tśěskoco kaž libotka“. Ta libotcyna (Espe/Zitterpappel) abo wósyca (populus tremula) jo wordowała bom lěta 2026, wuzwólona wót Załožby dr. Silvius Wodarz. Toś to mytowanje jo kradu wažne, dokulaž hynac ako pśi wuzwólowanju zagrodowego zwěrjeśa, zabydnjo wjele luźi wjelerakosć a wažnosć domorodnych bomow. Mimo togo njewuzwóluju lubowarje pśirody bom, ale interna komisija załožby. Na pśikład su łoni se rozsuźili za amerikański cerwjeny dub.

Ale co kwalificěrujo libotcynu? Toś ten bom jo wopšawdu wjelebocny a jěderny. Rosćo tam, źož ma wjelgin wjele swětła a samo na zapusćonych rolach wóna stoj. Płaśi ako pioněrka, dokulaž rosćo teke na swětlinach, kenž su dla wognjow w gólach nastali. Tak šćita zemju pśed eroziju a pśigótujo zemju za slědujuce druge bomowe družyny.