Z Bórkowy/Burg. W běgu dweju pśeběgowu su lětosa zasej rědownje do Bórkow pśijěli, ako maju w šuli wucbu serbšćiny. Dogromady 84 źiśi pětego lětnika jo se tak schadowało wót 7. do 11. septembra za Šulu w zelenem.

Jich a ceptaŕki su pónjeźele pśiwitali sobuźěłaśerje Rěcnego centruma WITAJ (RCW), mjazy nimi projektowa wobźěłaŕka Katrin Lehmannojc a wjednik chóśebuskego wótźělenja RCW Bernd Melcher. Sobuźěłaśerja Aleksander Draguła a Maks Bagańc stej organizěrowałej projekt a nawjedowałej aktiwity w młodowni a w błośańskej wokolinje.

Prědny pśeběg, wót pónjeźelego do srjody, jo zapśěgnuł źowća a gólcy šule „Regine Hildebrandt“ z Chóśebuza, z Mozaikoweje šule w Picnju, Krabatoweje šule w Janšojcach a bórkojskeje šule „Mina Witkojc“. Šula „Wilhelm Nevoigt“ a UNESCO-projektowa šula, wobej z Chóśebuza, žylojska Lutki-šula a šula „Mato Kosyk“ z Brjazyny su byli w drugem pśeběgu wót srjody do pětka pódla. Program za wšyknych jo był samski, wobgranicowane městno w młodowni pak jo projekt k tomu nuzkało, se wótměś w dwěma pśeběgoma.