Z Rubyna/Ruben. Do Stareje šule w Rubynje jo pśepšosyła srjodu tyźeń Seś jatšownych spiwaŕkow na pśedstajenje filma „Móc drastwy/Die Macht der Tracht“, kótaryž stej awtorka a režiserka Britta Wulf a kameramuž Reiner Nagel za rbb nawjerśełej. Swóju premjeru jo reportaža juž w juliju w ramiku magacina Łužyca swěśiła, ale weto jo wušej 35 woglědarjow do Rubyna pśichwatało. Zwětšego su sejźeli drastwynosaŕki a jatšowne spiwaŕki – to groni teke protagonistki filma – w publikumje, ale teke gósći z Rubyna, z drugich jsow a z Města. Astrid Šramina z Dolnoserbskeje kulturneje akademije a organizatorka Seśi jatšownych spiwaŕkow jo woglědarjow wutšobnje wuwitała a rozkładła, až su městno za pśedstajenje filma z wótglědom wuzwólili: Tam su žeńske z Rubyna a ze susednych jsow w lěśe 2017 wóžywili nałog jatšownego spiwanja. Jadna z nich jo Anett Zyšcyna, ako jo na tom wjacoru ako zastupnica a něgajšna dłujkolětna wjednica Domowinskeje kupki Rubyn gósći póstrowiła.