Ze Złego Komorowa/Senftenberg. Wulicujo se tšojenje młodego luźa, kenž – se naźejucy na lěpše žywjenje – se zabjerjo ze złymi mócami a se naslědku we nich zapletujo. Ale móc lubosći buźo jogo wumóženje. Krabatowa powěsć jo bźezcasna maśizna a funkcioněrujo wšuźi. Weto jo wóna „doma“ we serbsko-nimskej Łužycy a togodla jo to dobre a pšawje, až se toś ta maśizna na łužyskich jawišćach prezentěrujo. Tak jo se wjaseliło Nowe jawišćo Zły Komorow (Neue Bühne Senftenberg), až jo mógało inscenaciju „Krabat“ wót režisera, awtora a muzikarja Markolf Naujoks (prědny raz pokazana 2019 w Mainzu) dobyś (glej teke pśinosk w Nowem Casniku wót 10. septembra, kenž te slězyny wobswětlijo). Graśe, kótaregož zakład jo roman Ottfrieda Preußlera, jo 19. septembra premjeru we Złem Komorowje swěśiło. Dogromady jo dało wósym pśedstajenjow, wót nich styri šulske pśedstajenja. Slědny termin lětosa jo był njeźelu, 27. septembra.