Z Města/Cottbus. Stwórtk, 17. septembra, su byli wótpołdnja starjejše, stare starjejše a gósći wutšobnje pšosone do chóśebuskeje Witaj-źiśownje „Villa Kunterbunt“, aby sobu swěśili ten wjeliki zgromadny žnjowny swěźeń. Pśi tom su źiśi mógali wšakorake serbske žnjowne nałogi wuproběrowaś: kokota na wupyšnjonych wrotach su łapali (mimo togo teke wjelgin woblubowane lizaki we formje kokota), su grali zabijanje kokota z tym, až su ze zwězanyma wócyma z cepami na zbórk bili, a źowća (młoge rědnje burske woblacone) su karowali suknowe žaby.