Z Pódstupima a Błotow/Potsdam und Spreewald. Wósebnje ekstremna górcota a małe spadki lětosa su k tomu wjadli, až wšuźi w Europje maju rěki a jazory historiski niske pegele. Toś ten problem mamy teke w pódpołdnjowej Bramborskej a z tym we Błotach. Južo kóńc julija jo Bramborski krajny amt za wobswět gromadu zwołał kraje pśesegajucu źěłowu kupku z Barlinjom a Sakskeju, aby w Sprjewinych stronach napšawy pó koncepśe za nisku wódu na drogu spórali. Z tym su eksperty z wódowych zastojnstwow a zagronite z krajnego amta pśi Lubušu (Leibsch) wótběžanje wódy wobgranicowali a su pówušyli wótedaśa wódy z gaśeńskego jazora Grodk.

Dla wusokich temperaturow a wjelikeje suchoty jo se w běgu awgusta situacija w Sprjewi pśiwóstśiła. Dla togo su zajźony tyźeń wałtoru wuwołali drugu fazu koncepta za nisku wódu a su póstajili dalšne napšawy. K nim słušaju zacynjenje pušćalnicow w Dolnych Błotach, póniženje wódnego stawa w gaśeńskich jazorach a teke cełodnjowny zakaz braśa wódy z rěkow, tšugow a jazorow za wobydlarjow.