Z wokrejsowu Łobjo-Halšter a Górne Błota-Łužyca. W zwisku z wudobywanim brunice jo se rěka Carny Halšter mócnje zrownała, aby mógła se wóda z wuglowych jamow malsnje wótwóźiś. Na wšaki part se to njederje wustatkujo. Tak tam źinsa pśewjele wódy wótběžujo z krajiny. Teke w lětosnem lěśu se zwěsćijo alarměrujucy niski wódny staw Carnego Halštra.

NABU jo zapódał 8. junija projektowu skicu za renaturěrowanje Carnego Halštra, za tym, až wót 1. maja płaśi nowa spěchowańska směrnica za pśirěcne strony (Flussauen). Něnto jo se znate cyniło, až projektowa skica k renaturěrowanje Carnego Halštra jo se wót zagroniteje „Zukunft Umwelt Gesellschaft gGmbH“ pozitiwnje wugódnośiła – to wót NABU naraźone póstupowanje se wuzwólujo za stajenje póžedanja. Akciski zwězk Carny Halšter jo ako projektowy partnaŕ wobźělony.