Z Města/Cottbus. Rědne serbske zuki su zaklincali slědny tyźeń srjodu w Konserwatoriumje Chóśebuz. Tam ga jo se wótměł serbski sinfoniski koncert Serbskego ludowego ansambla Budyšyn. Wěcej ako góźinu su muzikarje a muzikaŕki serbskeje komorneje filharmonije na instrumentach grali. Dirigěrował jo Zdeněk Červinka z Pragi, kenž jo krotkocasnje pśewzeł wjeźenje orchestera, dokulaž pópšawna dirigentka Katharina Dickopfowa jo chóra była.

Dogromady šesć muzikowych kusow su na toś tom wjacerju prezentěrowali. Mjazy drugim „Koncertna suita: Přespolo“ wót Jana Bulanka a „W Błotach“ wót Kurta Karnawki a dalšne. Na kóńcu jo hyšći solist Miłosz Wieliński doprědka pśišeł a jo na wiolinje „Serbsku rapsodiju“ wót Bjarnata Krawca grał. W komornej filharmoniji jo 6 žeńskich a 12 muskich wustupiło. Bóžko pak jo jano mało luźi na toś tom dnju drogu do Konserwatoriuma Chóśebuz namakało, aby rědnej serbskej klasiskej muzice pśisłuchało.