Ku góźbje dnja žeńskich jo wokrejs Sprjewja-Nysa se něco za swóje sobuźěłaśeŕki wumyslił, a to juž pětk. A wobźělnice zapustow su nanejmjenjej rože dostali. W Cazowje wót prědkstojarja. 
Z Dešna a Cazowa/Dissen und Zahsow. Sobotu jo był mjazynarodny źeń žeńskich. Jo to źeń, kenž se pósćiwa pominanjam k doźaržanju pšawow žeńskich a rownopšawnosći, a wšake akcije w bogatej licbje se ku góźbje togo dnja wótměju. Tak na pśikład jo wokrejs Sprjewja-Nysa (SPN) južo pětk, ale w zwisku ze slědujucym dnjom žeńskich, něco za sobuźěłaśeŕki togo wokrejsa organizěrował, ga za take, ako maju słužbny jubilej. Wóni su se pśepšosyli do Domowniskego muzeja Dešno, źož su mógli se woglědaś wustajeńcu, serbske jatšowne jaja mólowaś a program Pytka dožywiś. Teke krajny raźc Harald Altekrüger a serbska zagronita wokrejsa SPN Romy Ruffowa stej tam na woglěźe byłej.
Sobotu, se wě, jo se w młogich našych jsow zapustowało. Njejsu zabyli, ku góźbje togo dnja tek žeńske cesćiś. W Cazowje na pśikład jo prědkstojaŕ Sören Heyn zapustaŕkam pśed pśeśěgom rože darił.
