Ze zaźiwanim som cytała wótegrono zastupnego jadnarja Domowiny, až njejo móžno głownej zgromaźinje Domowiny – župy Dolna Łužyca slědowaś pśez live-stream. A to nic dla ewentuelneje krotkodobneje pšosby. Słuša k tomu, až som wósobinski južo pśed 14 dnjami pósłała mejlku na Domowinu w Chóśebuzu, w Budyšynje a na župana w Dolnej Łužycy dr. Pětša Šurmana ze samskeju pšosbu. Pó našej głownej zgromaźinje chóśebuskeje Domowinskeje kupki smy to pón ako cłonki hyšći raz pódšmarnuli, a pśedsedaŕka kupki Sabina Siegowa jo pótom ceło oficialnje hyšći raz z boka kupki toś to žycenje wugroniła a pisała na Domowinu. Pó dlejšem casu smy dostali wótegrono z pókiwom, až to by płaśiło 600-800 €, což jo pśedrogo... Lubše luźe, ja se něnto pšašam, jo to jaden argument? Howacej se pśecej wuzwignjo, až my smy ta nejwětša župa we Zwězku z někak 2.600 cłonkami wót 7.500 cłonkow dogromady.