Ze Złego Komorowa/Senftenberg. Njeźelu 1. septembra jo kazała ewangelska wósada na wósebnu namšu do Ewangelskeje cerkwje Pětša a Pawoła. W nabity połnem Bóžem domje su se rozžognowali z fararjom Manfredom Schwarzom, kenž jo statkował wót lěta 1990 we złykomorojskej wósaźe a jo šeł kóńc awgusta na wuměńk. Teke wósadniki a kolegi ze susednych jsow a městow su pśichwatali, aby pokazali swóju zwězanosć z tym woblubowanym fararjom. Póstrowne słowo wót źěłoweje kupki Serbska namša stej pósrědniłej Madlena Norberg a Hartmut S. Leipner.

Jo zasłužba fararja Schwarza, až jo se zachowała Serbska cerkwja we Złem Komorowje. Na zachopjeńku 2000tych lět jo była we wjelgin špatnem stawje, a město jo ju kśěło wótryś. Město togo jo se starał Manfred Schwarz wó to, až jo była wobnowjona. Mjaztym słužy južo 20 lět ako bergaŕski dom za wšake zmakanja. Z pódpěru M. Schwarza jo se teke raźiło, až na tom tradicionelnem městnje se wótměju zasej serbske namše. 18. awgusta su tam swěśili 15. serbsko-nimsku namšu nowšego casa.