Z wjelikim žałowanim rozžognujomy se z našym dłujkolětnym pśedsedarjom Domowinskeje kupki Dešno. Günter Jahn jo wójował až do 29. maja 2024 ze swójeju śěžkeju chórosću.

Wón jo w serbskorěcnej familiji w Dešnje wótrosł a jo maturował na tegdejšej Serbskej rozšyrjonej wušej šuli „Marjana Domaškojc“ w Chóśebuzu.

Ako młodostny jo był do Dešańskich tradicijow a nałogow aktiwnje zapśěgnjony.

Pó swójom wuspěšnem studiju wódogóspodaŕstwa w Drježdźanach jo bydlił ze swójeju familiju zasej w Dešnje. Južo w młoźinskem casu jo se angažěrował w pozawnowem chorje našeje wósady a pózdźej teke we wósadnej raźe.

W lěśe 2004 jo wón pśewzeł pśedsedstwo Domowinskeje kupki Dešno na pšosbu cłonkow a to až do lěta 2022. Ze swójeju měrneju a pśijaśelneju wašnju jo rozměł Günter Jahn, cłonkow Domowinskeje kupki do swójich idejow a projektow zapśimjeś.