Z Lipska/Leipzig. Nowy zymski semester na Lipšćańskej uniwersity jo se 4. oktober zachopił. Pó natwarjenju góźinskego plana jo profesor instituta za sorabistiku Edward Wornaŕ wuwitał nowych študańcow. Teke pśedsedaŕ Domowiny Dawid Statnik jo jim rědny start žycył a póbitował pomoc we pšašanjach praktikumow. Franciska Albertowa wót Domowiny jo pśedstajiła študańcam swóje aktiwity a jo pódšmarnuła móžnosći sobuźěła. Měto Nowak, referent Krajnego zagronitego za nastupnosći Serbow w Bramborskej, jo nowych a „staršych“ študańcow za zgromadne źěło wabił. We tom lěśe stej dwa nowej studenta z Górneje Łužyce zachopiłej na ceptaŕstwo studěrowaś. Z Pólskeje a Českeje stej stipendiata, pódpěranej wót Załožby za serbski lud, zachopiłej na lěto serbšćinu w Lipsku studěrowaś. Někotare študańce su zachopili serbski wuknuś we wobłuku facha „europske mjeńšynowe rěcy“. AA1Foto a tekst: L. W.1AAA
