Wjaselimy se, až móžomy zasej graś na dolnołužyskich jawišćach!

Dnja 23. apryla buźo zeger 19:30 premjera kusa „Jaja z kraja“ we Hochozy we Złotnem plonje (Goldener Drachen)! A wó to źo we kusu: W kradu zanjasonej prowincy, daloko pšec wót měsćańskeje hektiki, wjedu protagonisty teje komedije spódobne a spokojne žywjenje. Ale něco rozsudnego felujo: za kuždy gjarnc góźbne wěko, to groni za kuždego kjarla pšawe źowćo. Ale wótkul dobraś? Su kontaktowe anonse hyšći na casu? Abo póbituju chatowe rumy a widejowe portale w interneśe nacasnu móžnosć, žeńske za žywjenje na jsy z tamnymi prawobydlarjami a jich zaběranjami à la treckertuning zagóriś?

We tej komediji, połnej komiskich wokognuśow a žednych kradu cłowjeskich dowiźenjow, zagórjuju charaktery rowno tak ako dialogi. Wopšawdne žywjenje njeby to mógało žortnjej napisaś. Pśisamem by mógali Janoju, Jensoju a wšyknym tym drugim žycyś, až njeby žeńske namakali, až njeby se źiwadłowy wjacor žednje skóńcył. Ale teke ta komedija ma kóńc – teke pón, gaž snaź hynac wujźo, ako jo se luź na zachopjeńku wucował.