Hochoza/Drachhausen. Ako Domenik Krötel, nowy wjednik hochoskeje młoźiny, jo w zalu Złotego plona njeźelu zapustarje witał, njejo był wochylu wěsty, wjele pórow buźo na tom dnju we pśeśěgu sobu gnaś: 26 abo 27? To zamólenje jo nastało pśez to, až jaden pórik jo „pśiskócył“ akle we slědnem wokognuśu. „Wina“ na tom jo Florian Wenzel ze jsy – student elek­trotechniki na BTU w měsće. Roz­mjej: wón jo dejał ned na drugi źeń, pónjeźele, to slědne wjelike pisne master-pśespytowanje měś. Co ga něnt dej cyniś: swěśiś abo wuknuś? Wón jo dłujko wótlekał, ale naslědku, na zapustojskej reji sobotu w nocy, jo wón wobzamknuł, až buźo swěśiś. „Ja som južo te dny pjerwjej wuknuł a cuju se mócny – to buźo se južo raźiś. Ja som cuł, až ja njebudu móc se źinsa pšawje koncentrěrowaś, gaž ceła hochoska młoźina gótujo sobu“. To bubnowanje a tšubjenje ga rozlěga pó cełej jsy!