Bórkowy/Burg. Pśisamem 20 lět dłujko zapalijotej Dziumblic na 1. adwenśe te swěcki na swójem drebomje. Domowniske slěźarje, chronisty, wuměłce a pśijaśele muziki su toś pśišli do spódobneje rundy do domowniskeje jśpy na Droze serbskego krala. „To jo pśecej wjerašk w adwenśe“, jo groniła wušywarka Christa Dziumblina. Na drebomje su se wjerśeli drastwowe pupcycki, drjewjane zwěrjeta, sněgowe źědy a kule ako na małem karuselje.

Kak jo pśišeł drebom do Błotow? „Jadna familija we jsy ma swój drebom južo 250 lět dłujko“, jo rozkładł Dieter Dziumbla. Wón jo něga był mašinist a jo jězdźił z bagerom. Źinsa statkujo wón ako šykowny baslaŕ.