Na konferency jo prof. Peter Droege z Liechtensteinskeje uniwersity ideje swójich študańcow pśedstajił. Jich prědny źěl ma cyniś z wódu a ze Sprjewju: něgajšna elektrarnja by mógała se tak pśetwariś, aby rěcnu wódu cysćiła a tu górnistwa dla skazonu zemju regenerěrowała. How deje slěźarje měś šyroke pólo za slěźenja. Turisty deje móc wjele zgóniś wót ekologije a cysćenja wódy, a to dej byś zwězane z wótpócynkom a atraktiwnymi dožywjenjami. Za nje deje nastaś muzeje, parki atd. „Wódna turistiska ruta“ pśi Sprjewi dej z Barlinja až how wjasć. Wódny turizmus, slěźarske instituty a ekologiska industrija (na pśikład gótnica papjery) deje źěłowe města pśinjasć.
Tejerownosći z cysćenim wódy a zemje ma cyniś ideja: z wugloweje jamy njedeje napóraś jazoro, ale wjelike mokše strony: ługi, tśmjenje a tymjeńce, ako budu ze sobu z groblami a tšugami zwězane. Pśez nje dej rěka (Góramśica) běžaś. How deje rostliny to cysćenje we wjelikem stilu wobstaraś, a wokoło togo mógali nastaś slěźarske centrumy za biodiwersitu, regeneraciju zemje a wódy a za cysćenje wobswěta.