Gaž jěźoš tu rowno drogu z Brjazyny na Góry, pón wiźiš na pšawem boce wjelike pólo z małymi bomkami, wobdane z płotom. Dotychměst njejsom tak pšawje wěźeł, kake bomy abo kricki to su a chto jo je tam nasajźał pśed žednymi lětami. Něnt pak to skóńcnje wěm, som toś zasej tšochu mudrjejšy. Tam rosćo baz – nic ako źiwy keŕ abo krick, ale ako bom. Gano som tam póbył a som wěcej wó tej nowej plantažy zgónił a słyšał.

Pśepšosył jo mě tamkor Juro Hanška z Brjazyny, něgajšny wuknik Serbskeje rozšyrjoneje wušeje šule „Marjana Domaškojc“ w měsće, pśedsedaŕ Domowinskeje kupki w Brjazynje, a něntejšny wjednik inženjerowego běrowa za pósuźowanje (Sachverständigerbüro). Wón ga jo ten wobsejźaŕ togo póla z bazom. Něga su how byli na tych něźi tśich hektarach póla a te jo wón kupił. Wokoło lěta 2010 jo how nasajźał něźi 1000 bazowych bomkow wót teje sorty „Hasch-berg“. Pśed 4 lětami su mógali prědny raz bazowki tergaś. A teke lětosa su to kóńc awgusta a zachopjeńk septembra cynili, prědny raz ten wětšy źěl, drugi raz te zbytne bazowki. Jogo žeńska a druge luźe ze jsy su pśi tom pomagali.